ياللي طالعين على الطريق.. ياللي عارفين السبيل.. كملوه ..وان كان طويل ومهما كان ظلام الليل وعضة الرتبه العويل .. كملواه
هتوصلوا لآخر الطريق
هتوصلوا لآخر الطريق
***
ياللي طالعين على الطريق.. يكفيكم شر الزعيق والجدال اللي يودي للخرف
ويهديكم خير الرفيق والطريق مهما طال..لو يودي للهدف
***
يكفيكم شر القهروحني الظهر
وشر صدمة الأحلام..في صخر العلم
وشر كتمة الآلام..في سجن الصدر
ووحشة الليل في عز الظهر
***
يكفيكم شر السكات والسبات والجمود ..وحياة بتكون ساعات أسوأ حتى من الممات
إوعاكم من التنازل والتخاذل.. لاحسن دا بير من المرارمالوش قرار
***
يكفيكم شر الخنوع والخضوع واليأس من ضي الشمس قبل السطوع
يهديكم نور الطريق ويكفيكم شر الرجوع ..حتى لو طال الطريق ..يكفيكم شرف الشروع
***
ما تسمعوش لو حد قال دا مستحيل
ولو حتى كان زي ما قال خطوة خطوة يتحطم صخر المحال
ويتحقق اكتر من اللي اتقال في يوم ده مستحيل
***
ياللي واقفين على المفارق اسمعوا صوت المطارق والرايات والبيارق
وهتافات الإضرابات اللي اقوى من البنادق ..واسمعوا صوت ناس علقوا لخوفهم مشانق
اسمعوا صوت حد داس باقدامه قانون الطواريء
ياللي واقفين على المفارق ..اتنسموا ريحة سواعد شعب صاعد هازيء بالمهالك
واتنسموا ريحة زهور فروعها طالت بره السور..طرحت نوروعطورها فاحت في المسالك
اختاروا الطريق ولا تفضلوش على المفارق
***
غلطان اللي ينسى حلمه أو يهمله
غلطان اللي ينسي سبيله ولا يكمله
غلطان اللي ما يدورعلى الطريق وعن رفيق يشبهه يونسه وينبهه
غلطان اللي يفكر يمشيها ويلايمها ويعديها ويغير جلده حسب المناخ
ده الصقرما ينحبس زي الفراخ والمهرما يتربط وسط السباخ
واعذروني لو الختام ريحته يعني مش تمام
والسلام
إمـــــضـــــاء
طــالـــب مـــتــــقــــاعـــــد
0 التعليقات:
Post a Comment